A proposta baséase no clausulado do convenio asinado en 2006 entre o Concello e a ONCE, texto polo que o Concello obtivo a posibilidade de pasar a ser titular deste inmoble dende o momento da aprobación provisional da modificación puntual para recualificar os terreos da finca de Campolongo. Este trámite xa está realizado dende o pasado 30 de xaneiro. Teresa Casal entende que o Concello ofrece unha posibilidade factible e realista para aliviar as carencias de espazo no campus. Ao mesmo tempo, indicou que abre novas perspectivas de futuro, unha vez que a ONCE remate o seu novo Centro de Recursos Educativos na parcela que lle cede o Concello na Unidade de Actuación 18, o polígono que se está a executar con fronte á rúa 12 de novembro. Chegado ese momento, o Concello xa será titular do edificio do colexio da Organización Nacional de Cegos en Campolongo, que tamén podería destinarse a reforzar o campus pontevedrés. A tenente de alcalde explicou que o protocolo que o Concello tiña asinado coa Xunta para ceder estes dous inmobles á Administración autonómica cun fin sociosanitario nunca foi elevado a convenio e tampouco se manifestou interese por aquela previsión. Engadiu Teresa Casal que, en todo caso, a Xunta dispón en pleno centro da cidade dun magnífico edificio accesible e axardinado como é a antiga delegación da Consellería de Sanidade, que responde perfectamente a este fin. Fuente: Ayuntamiento de pontevedra
|